Objektiva ne Bujqesi per vitin 2007
1. Ecje drejt specializimit të prodhimit
bujqësor vendas në perime, vreshta, frutikulturë dhe blegtori;
2. Konsolidim të përpjekjeve për krijimin e
rrjetit të marketingut të prodhimit bujqësor e blegtoral vendas;
3. Hapa shumë të rëndësishme në përmirësimin e
standardeve të sigurisë ushqimore, kontroll i hallkave të zingjirit të
prodhimit vendas, përmirësim i ndjeshëm i punës në stabilimentet tona të
agroindustrisë, si në ato të peshkut, vajit, frutave, mishit, qumështit,
perimeve, etj.
Nga Fitim Zekthi
Këshilli i Ministrave miratoi vendimin për
nxitjen e zhvillimit të vreshtarisë, pemtarisë dhe ullirit, me të cilin për
herë të parë në historinë e 15 viteve, buxheti i shtetit shqiptar fillon të
mbështesë financiarisht aktivitetin e fermerëve shqiptarë. Ministria e
Bujqësisë Ushqimit dhe Mbrojtjes së Konsumatorit ka prezantuar dje programin e
punës për vitin 2007, ku si prioritet kryesor do të jetë mbështetja e fermerëve
vendas. Ministri Gjana, gjatë fjalës së tij tha se, në të njëjtën ditë me
programin e punës është dorëzuar pranë Këshillit të Ministriva edhe plani i
detajuar për zhvillimin e vreshtarisë dhe pemtarisë, për të cilin qeveria ka
akorduar rreth 4.2 milionë euro. “Në të njejtën ditë me dorëzimin e këtij
programi pune të detajuar, Këshilli i Ministrave miratoi vendimin për nxitjen e
zhvillimit të vreshtarisë, pemtarisë dhe ullirit, me të cilin për herë të parë
në historinë e 15 viteve, buxheti i shtetit shqiptar fillon të mbështesë
financiarisht aktivitetin e fermerëve shqiptarë. E filluam zbatimin e skemave
mbështetëse financiare me vreshtat e pemtoret si një prej prioriteteve të
objektivit madhor për specializimin e prodhimit në fermën shqiptare”, - tha
Gjana.
Sipas ministrit, bujqësia gjatë vitit 2006
vendosi vendosi themelet e para në tre objektiva kryesore, si ecja drejt
specializimit të prodhimit vendas në perime, vreshta, frutikulturë, blegtori
etj. “Hapa shumë të rëndësishme në përmirësimin e standardeve të sigurisë ushqimore,
kontroll i hallkave të zingjirit të prodhimit vendas, përmirësim i ndjeshëm i
punës në stabilimentet tona të agroindustrisë, si në ato të peshkut, vajit,
frutave, mishit, qumështit, perimeve, etj. Kontrolle rigoroze në importet e
produkteve bazuar në standarde dhe në luftën pa kompromis ndaj informalitetit,
kontrolli i tregjeve, zbatimi i direktivave europiane për etiketimin në gjuhën
shqipe të produkteve ushqimore etj. 2007-ta do të jetë vit i konsolidimit dhe
thellimit të këtyre objektivave. Linjë kryesore veprimi do të mbetet, jo vetem
nxitja e prodhimit në sektorët prioritarë, por edhe përmirësim të zingjirit të
marketingut të prodhimit vendas. Veç studimit të thertoreve, ka përfunduar edhe
studimi për tregjet. Gjatë këtij viti do të investohet në ndërtimin e tregjeve
të mëdha bujqësore në Berat e Gjirokastër, të thertoreve në Shkodër, Elbasan,
Leskovik, Sarandë e Has”, - tha Gjana.
Sipas ministrit të Bujqësisë, hapa të
rëndësishëm gjatë vitit 2007 do të jenë përgatitja e legjislacionit që t’i përafrohet
standardeve të BE-së, kjo në kuadër dhe të nënshkrimit të MSA-së. “Hapa të
rëndësishme në 2007-ën do të jenë përgatitja dhe përafrimi i legjislacionit me
standardet e BE-së, jo vetëm si detyrim që buron nga MSA-ja, por si një
domosdoshmëri për ta modernizuar bazën tonë ligjore në fushën e ushqimit,
mbrojtjes së bimëve, ujitjes, kullimit dhe në mënyrë specifike, aktet për
veterinarinë, vreshtarinë e verën, qumështin etj. Për këtë qëllim do të
hartohen 7 projekt ligje të reja, 9 projekt vendime të Këshillit të Ministrave,
36 rregullore dhe udhëzime për fusha të ndryshme dhe disa urdhëra e udhëzime të
nivelit ministror”, - tha Gjana. Sipas tij, viti 2007 do të jetë viti i
fillimit të zbatimit të disa projekteve të rëndësishme për sigurinë ushqimore,
siç janë fondet e projektit CARDS e Kooperacionit Italian prej 5 milionë euro,
për krijimin e autoritetit kombëtar të ushqimit, për përafrim të
legjislacionit, ngritje të infrastrukturës dhe trajnim të kapaciteteve
njerëzore në këtë fushë. Projekti me fonde të BB-së prej 6 milionë
dollarësh është bërë për të mbajtur nën kontroll rigoroz e me standarde çdo
rast të mundshëm të shfaqjes së influencës aviare e marrjen e masave
parandaluese etj.
Kooperativizmi,
për 2007-ën do të bashkohen 1000 ha tokë
Sipas programit të prezantuar nga ministri
Gjana, në qendër të vëmendjes për vitin 2007 nga kjo ministri do të jenë dhe dy
çështjë të tjera të rëndësishme, kooperativizmi dhe agroturizmi. Sipas tij,
shembulli më i mirë për këtë janë 50 familje në Divjakë të Lushnjës, të cilët
kanë bashkuar rreth 150 ha tokë dhe prodhojnë perime për eksport. “Dy
iniciativa të tjera, kooperativizmi dhe agroturizmi do të jetë në qendër të
vëmendjes së ministrisë dhe strukturave të saj këtë vit. Do të vazhdohet të
punohet me shoqatën e fermerëve të Divjakës që sot janë 50 familje dhe kanë
bashkuar 150 ha tokë që prodhojnë perime për treg dhe eksport. Kjo, me qëllim
që të krijohet e para kooperativë josocialiste, por kooperativë e standardeve
bujqësore europiane në këtë zonë të njohur të prodhimit të perimeve. Synim do
jetë për ta bërë këtë kooperativë me 1000 ha tokë si një shembull që duhet të
paraprijë erën e re në kooperativizimin e bujqësisë. Brenda 3-mujorit të parë
2007 do të shpallim studimin pjesor pilot për agroturizmin në brezin e gjelbër
bujqësor të Tiranës në zonat Farkë, Petrelë e Baldushk, të kryer nga DRBU-ja e
Tiranës me asistencë të GTZ, me synimin për ta shtrirë këtë studim dhe nxitur
këtë veprimtari edhe jashtë Tiranës si në Shkodër e Malësi të Madhe, në Korçë
etj. Dy nisma të rëndësishme do të jenë gjithashtu në funksion të një
përformance të re për bujqësinë: hartimi i ligjit bazë për bujqësinë, bazuar në
standartet e BE-së dhe përgatitjet ligjore e infrastrukturore për të ndërtuar
me terma afatmesme, Agjencinë e Pagesave për Bujqësinë”, - tha Gjana.
